Naim Sadiku, anëtar i bordit të Asociacionit të Gazetarëve të Kosovës (AGK), ka folur në lidhje me protestën që u zhvillua nga gazetarët në sheshet e Prishtinës kundër vendimit të Ministrisë së Industrisë Ndërmarrësisë dhe Tregtisë (MINT), për pezullimin e licensës së mediumit “Klan Kosova”.
Ai gjatë një lidhje të drejtpërdrejtë në emisionin “Rreth e Rrotull”, në RTV Dukagjini tha se vendimi i Ministrisë së Industrisë, Ndërmarrësisë dhe Tregtisë (MINT) është tendencë për ta mbyllur një media dhe për të përçuar mesazh frikësues e kërcënues te mediat e tjera.
Ai thotë se në bashkëpunim me pjesëtarë të mediave e shoqëri civile kanë dalë të kundështojnë vendimin e MINT-it.
“Një vendim i tillë është si një tendencë për të mbyllur një media dhe për të përçuar më pastaj mesazhe frikësuese dhe kërcënuese për mediat e tjera në Kosovë”, është shprehur Sadiku.
Gjithashtu, Sadiku shprehet se ekziston frika se “fillon me mbylljen e një medias, pastaj vazhdon me mediat e tjera të cilat nuk i pëlqejnë pushtetit”.
Vendimi i MINT-it ka të bëjë me mbylljen e biznesit të Klan Kosovës, pasi, sipas tyre, ky i fundit është në kundërshtim me Kushtetutën e Kosovës, sepse e paraqet Kosovën si pjesë të Serbisë.