Anëtari i Partisë Socialdemokrate, Azdren Shala, teksa e ka komentuar deklaratën e kryeministrit të Kosovës, Albin Kurti, i cili e quajti naive deklaratën e sekretarit amerikan të shtetit, Antony Blinken, ka thënë se e njëjta është deklarata më skandaloze që ka pasur Kurti.
Në emisionin “Five”, në RTV Dukagjini, ku po diskutohet për gabimet e Qeverisë për situatën në veri, Shala ka thënë se mesazhi i vizitës së të dërguarit të posaçëm i SHBA-së për Ballkanin Perëndimor, Gabriel Escobar, dhe emisari i Bashkimit Evropian për Ballkan, Miroslav Lajçak, është mëse i qartë.
“Mesazhi i kësaj vizitë është më se i qartë, më shumë se mesazhi kërkesa eksplicite është se atje duhet të shtensionohet situata e ky shtensionim shkon në disfavor të Kosovës dhe krejt kjo fabulë e përshpejton edhe më shumë draft-statutin për ta zbatuar Asociacionin”.
“Deklarata e Kurtit drejtuar Blinkenit që e quajti naiv, është prej deklaratave apo qëndrimeve më skandaloze që ka pasur kryeministri. Më shqetëson kur kryeministri i një vendi del me këto deklarata skandaloze është e turpshme. Pasojat do t’i shohim në të ardhmen”, shtoi ai.
Sipas tij, çka ka bërë Qeveria Kurti me këto akrobacione është veç se e ka dhënë edhe një argument shtesë i treti me radhë për Bashkësinë Ndërkombëtare që praktikisht “kjo pjesë e Kosovës nuk funksionon më, rrjedhimisht duhet asociacioni apo vetëmenaxhimi që po i thonë”.
Ai ka theksuar se marrëveshja e planit franko-gjerman është baza e krejt kësaj, teksa shton se “ne e pamë një kryeministër që vepron me dy kapela që po i kushtojnë Kosovës”.
“Në Kosovë me atë kapelën e kryeministrit rezisent që nuk lëshon pe dhe me ndërkombëtarët pas disa trazirave me na bind neve që është rezistenti, e vë kapelën tjetër bëhet ai njeriu konstruktiv, bashkëpunues”, tha ai.
Ai ka potencuar se krijimi i Asociacionit të komunave me shumicë serbe është i pashmangshëm.