Analisti i çështjeve politike, Ibrahim Shala, ka thënë se zhvillimet që çuan në zgjedhjen e presidentes së re të Kosovës nuk duhet të interpretohen si shantazh, por si rezultat i presionit të kohës dhe nevojës për një zgjidhje politike mes partive.
Në emisionin FIVE, Shala tha se VV-së dhe PDK-së nuk u leverdiste që vendi të shkonte sërish në zgjedhje, ndaj, sipas tij, palët u detyruan të gjenin një zgjidhje të përbashkët.
“Dëgjo, nuk është çështje shantazhi. Është çështje e presionit të kohës. Këto janë parti politike, është garë politike, kanë objektiva politikë dhe kuptohet që ka fërkime mes tyre”, tha Shala.
Ai tha se, me afrimin e afatit për zgjedhjen e presidentit, të dyja palët e kishin interesin që të shmangnin zgjedhjet e reja.
“VV-ja nuk kishte nevojë, PDK-ja nuk e kishte atë luks të përballej edhe njëherë me zgjedhje. Atëherë normalisht që do të kërkohet zgjidhje e përbashkët dhe në këtë rast të dyja palët kanë bërë konsensus”, deklaroi ai.
Sipas Shalës, marrëveshja u ka sjellë përfitim të dyja partive, ndërsa zgjedhja e Justina Shiroka-Pulës, e cila ka qenë pjesë e PDK-së, i ka dhënë kësaj partie edhe një rol në procesin e zgjedhjes së saj.
“E ka një presidente që ka një origjinë prej Partisë Demokratike, një presidente që edhe ajo ka kontribuar që të zgjidhet dhe që është shumë kredibile, siç po i shohim edhe vlerësimet që po bëhen për të”, tha Shala.
Ai tha se, tani që presidentja është zgjedhur, nuk mund të kthehet procesi prapa, ndërsa theksoi se prioritet duhet të jetë stabilizimi i institucioneve.
Gjithashtu, Shala tha se, pavarësisht se procesi idealisht do të duhej të përfundonte më herët, zgjedhja e presidentes ka shmangur një situatë edhe më të vështirë.