Sekretari i Përgjithshëm i NATO-s, Jens Stoltenberg do të takojë veçmas kryeministrin e Kosovës, Albin Kurti dhe presidentin e Serbisë, Aleksandar Vuçiq më 17 gusht, një ditë para takimit të të dy liderëve në Bruksel.
Pas këtyre dy takimeve të shefit të NATO-s me Kurtin dhe Vuçiqin, do të ketë edhe konferencë për media, bëhet e ditur në njoftimin e NATO-s.
Konferenca për media ndërmjet Stoltenbergut dhe Vuçiqit do të mbahet në orën 15:30, ndërkaq me kryeministrin Kurti do të mbahet në orën 17:00.
18 gushti është data në të cilën parashihet të takohen në Bruksel kryeministri i Kosovës, Albin Kurti dhe presidenti i Serbisë, Aleksandar Vuçiq.
Një takim i tillë vjen si rrjedhojë e tensionimit të situatës në veri, për shkak të marrjes së vendimeve në kuadër të reciprocitetit ndaj Serbisë.