Më 30 nëntor, Qeveria e Kosovës ka ekzekutuar shtesat në vlerë prej 100 euro për studentët por, disa studentë janë ankuar se ende nuk i kanë pranuar ato.
Për Portalin Dukagjini, zëdhënësi i Qeverisë së Kosovës, Përparim Kryeziu, ka thënë se Komisioni Zbatues është duke e vazhduar punën për verifikimin e grupeve tjera të studentëve që tashmë kanë aplikuar.
“Javën që lamë pas janë proceduar pagesat për grupin e parë të studentëve. Komisioni Zbatues është duke vazhduar punën për verifikimin e aplikimeve të pranuara”, ka thënë Kryeziu.
Aplikimi ka qenë i hapur prej datës 20 tetor deri më 6 nëntor, në platformën eKosova, ngjashëm sikurse herën e kaluar për studentët shtetas dhe joshtetas që studiojnë në Kosovë.
Po ashtu, ministri i Financave, Punës dhe Transfereve, Hekuran Murati, më 30 nëntor nëpërmjet një postimi në Facebook, kishte bërë të ditur se 50 mijë e 778 studentë kanë pranuar mbështetjen e njëhershme prej 100 euro në kuadër të Pakos për Përballje me Inflacionin.
Kujtojmë se, në fund të shtatorit të këtij viti, kryeministri Albin Kurti dhe ministri Murati, dolën në konferencë të përbashkët për të prezantuar masa të reja në kuadër të Pakos Ekonomike për përballje me inflacionin.
Me këto masa përfshihej subvencionimi i faturës së energjisë elektrike për ata që kursejnë rrymën, subvencionim prej 50 për qind të rritjes së pagës për punëtorët e sektorit privat që marrin pagë deri në 1 mijë euro, ndarja e shtesave për punonjësit që kanë pagë deri në 1 mijë euro në ndërmarrjet publike, si dhe shtesa për pensionistët, familjet me asistencë dhe studentët.
Ndërsa, të martën e 29 nëntorit, Qeveria e Kosovës në mbledhjen e 110 të saj, kishte aprovuar kërkesat e Ministrisë së Financave për ekzekutimin e pakos për përballje me inflacionin, ku parashihet ndarja e shtesave prej 100 eurosh për punonjësit e ndërmarrjeve publike edhe studentët.