Ankesa e mbrojtësit të të arratisurit, Enver Sekiraqa që ai të pres plotfuqishmërinë e vendimit ndaj tij në liri, është refuzuar.
Vendimin e ka marr Gjykata Supreme e cila e ka konfirmuar vendimin e Apelit për kthimin e Enver Sekiraqës në paraburgim pasi ishte dënuar me 25 vjet burgim për nxitje në vrasjen e policit Triumf Riza.
Mbrojtësi i Sekiraqës, avokati Besnik Berisha në ankesën e tij për vendimin e Apelit, sipas Betimit për Drejtësi, kishte theksuar se ankesa e Prokurorisë Speciale nuk kishte mbështetje ligjore.
Por, vendimin e saj e ka arsyetuar Supremja.
“Kjo Gjykatë vlerëson se ka bazë ligjore për caktimin e masës së paraburgimit konform nenit 184 par. 1 nën par. 1.1 e 1.2 pika 1.2.1 të KPP, duke pasur parasysh lartësinë e dënimit të shqiptuar, është rrethanë e cila tregon rrezikun se me lënien në liri të të pandehurit ekziston mundësia që i njëjti të pengojë rrjedhën e procedurës penale duke u arratisur, ikur apo fshehur për t’iu shmangur përgjegjësisë penale, e në këtë mënyrë pamundësohet zhvillimi i rregullt i procedurës penale”, thuhet në vendimin e Supremes.
Ironia në gjithë këtë mes është se derisa instancat e gjykatave kanë miratuar vendimin që Sekiraqa të kthehet në paraburgim, ai vazhdon të ndodhet në arrati e jashtë Kosovës.
Madje akoma nuk dihet nëse për të është bërë kërkesa për urdhërarrest ndërkombëtar.
Kësaj pyetje nuk i është përgjigjur Policia e Kosovës pavarësisht që Dukagjini është interesuar për këtë çështje tash e 10 ditë.
Gjykata Themelore e kishte lënë në liri të mbrohet Sekiraqa pasi ishte shpallur fajtor dhe dënuar derisa më pas ai është arratisur.
Për këtë vendim është suspenduar kryetari i trupit gjykues, Agim Kuçi dhe ndaj tij është nisur procedurë disiplinore sepse edhe në raste të tjera kishte marr vendime për masën e sigurisë ndaj Enver Sekiraqës pa u konsultuar me dy anëtarët e tjerë të trupit gjykues.