Ministri i Punëve të Brendshme, Xhelal Sveçla, në Komisionin parlamentar për Siguri, ka kërkuar ardhjen në Kosovë të nënkryetarit të Listës Serbe, Milan Radojçiq, i cili kërkohet për lidhje për rastin e vrasjes së politikanit serb në Kosovë, Oliver Ivanoviq, për t’u përballur me akuzat nga institucionet e drejtësisë.
Në debat me deputetin e Listës Serbe, Slavko Simiq në Komisionin për Siguri, Sveçla i ka kërkuar atij që t’i bëjë presion Radojçiqit që t’i dorëzohet organeve të Policisë në Kosovë dhe jo të kërkojë hapësirë në Serbi.
Por deputeti, Simiq tha se Radonjiq nuk do t’i dorëzohet organeve të drejtësisë në Kosovë pasi, siç tha ai, është një proces i montuar.
Ndryshe, në këtë komision ai ka debatuar edhe me deputetë të opozitës.
Sveçla pas kritikave nga Deputeti i Aleancës për Ardhmërinë e Kosovës(AAK), Bekë Berisha, për arrestimet “spektakolare” të zyrtarëve policorë, ka thënë se nuk merret me emra, por me procese.
Ai për arrestimet e policëve dhe mundësitë e shkarkimit të drejtorit të Policisë, ka theksuar se “Nuk merrem me emra, por me procese. Ish-drejtorin, i cili tashmë është deputet e kam gjetur, se kam ndërruar, edhe drejtorin aktual e kam gjetur aty”.
Ai ndër të tjera ka shtuar, se ata që i ka gjetur aty, do të qëndrojnë apo ndërrohen varësisht prej nevojave të Policisë dhe punës së tyre konkrete.
“Ndryshimet e nevojshme brenda Policisë do të jenë në kuadër të reformave, kritereve dhe rregullave dhe ligjit”, ka shtuar ai.
Sveçla: Sulmet në veri kanë pasur për qëllim destabilizimin e vendit