Ministri në detyrë i Punëve të Brendshme të Kosovës, Xhelal Sveçla, ka reaguar ashpër ndaj deklaratave të ndihmësdrejtorit të të ashtuquajturës “Zyrë për Kosovë” në qeverinë serbe, Igor Popoviq, i cili gjatë një fjalimi të mbajtur në Rahovec ka përdorur gjuhë të ashpër kundër Ushtrisë Çlirimtare të Kosovës (UÇK), duke e cilësuar atë si organizatë terroriste dhe duke e krahasuar me ngjarje të rënda nga historia botërore.
Për pasojë, Popoviq është ndaluar nga Policia e Kosovës në pikën kufitare të Bërnjakut dhe është dërguar në stacionin policor në Mitrovicën e Veriut, ku ndaj tij pritet të merren masa konform ligjeve të Republikës së Kosovës.
Në një postim në Facebook, ministri Sveçla deklaroi se deklarimet e Popoviqit përbëjnë nxitje të urrejtjes dhe përçarjes ndëretnike në vend, ndërsa theksoi se Kosova nuk do të tolerojë fyerje dhe përdhosje të historisë së saj.
“Republika e Kosovës është shtet demokratik dhe sovran. Ne as nuk kemi cenuar një shtet tjetër, as nuk kemi provokuar popullatën e një shteti tjetër dhe as nuk do të lejojmë veprime të tilla ndaj nesh. Nuk do të tolerojmë fyerje dhe përdhosje të historisë sonë, e aq më pak të Luftës sonë Çlirimtare të udhëhequr nga UÇK-ja”, ka shkruar Sveçla.
Ai shtoi se kjo pjesë e historisë gëzon respektin e të gjithë botës përparimtare dhe se retorika e modelit millosheviqian, që sipas tij ende mbahet gjallë nga administrata serbe nën drejtimin e Aleksandar Vuçiqit, është e dënueshme, e pavërtetë dhe e rrezikshme për marrëdhëniet ndëretnike dhe fqinjësore.