Shefi i Grupit Parlamentar të AAK-së, Besnik Tahiri e ka kritikuar Qeverinë për mungesën e materialit për pasaporta.
Përmes një postimi Tahiri ka thënë, “Përderisa vendet normale bëjnë gara që pasaporta e tyre të rangohet sa më lart nga vendet e tjera, qeveritarët tanë shkelin pasaportën aty ku prodhohet, në burim”.
Sipas Tahirit, kjo është “shkelje fundametale e të drejtave dhe lirive themelore, me kosto të lartë emocionale, financiare dhe të gjithmbarëshme për njerëzit dhe familjet”.
“Përmes logjikës së shkatërrimit të krejt asaj çfarë ishte ndërtuar, përfshirë edhe ofrimin e shërbimeve, e sollën punën që qytetarët t’i lënë pa pasaporta. Kjo qeveri e ka konceptin që gjithçka fillon nga zero dhe gjithçka fillon me ta”, ka shtuar Shefi i Grupit Parlamentar të AAK-së.
Tutje, ai ka theksuar se pasaporta është shenja më e rëndësishme identifikuese e një shteti. “Kjo qasje ka kosto edhe për imazhin dhe reputacionin e shtetit tonë”.