“Nuk ka logjikë normale që një ministër i thotë një sektori privat rritni rrogat se i keni rritur fitimet, ndërsa këtij që i është rritur buxheti nuk e bën të njëjtën”.
Kështu ka deklaruar shefi i Grupit Parlamentar të Aleancës për Ardhmërinë e Kosovës (AAK), Besnik Tahiri pas deklaratës së ministrit të Financave, Hekuran Murati se është koha që fitimet e shtuara, bizneset t’i ndajnë me ata që ua mundësojnë atë.
Sipas tij, ministri Murati e ka në dorë ngritjen e pagave për sektorin publik, gjersa ka shtuar se “nuk ka sjellë ligjin e pagave, as koeficientin”.
Po ashtu, për buxhetin e vitit 2023 që pritet të jetë në rend dite këtë të enjte në seancën e Kuvendit të Kosovës, ka thënë se është një buxhet “totalisht pa vizion dhe i pareflektueshëm në gjendjen që është Kosova”.
Ndërsa, për situatën aktuale në veri të vendit, ai ka thënë se AAK-ja ka propozuar një interpelancë me kryeministrin Kurti, por që sipas tij është shumë shqetësuese që në një situatë të tillë “ai të gjendet jashtë vendit”.
“Për të më e rëndësishme është të jetë jashtë vendit se brenda”, ka deklaruar Tahiri.
Ai e ka quajtur qasje të “padenjë” qasjen e qeverisë ndaj situatës në veri të vendit.
Aleanca për Ardhmërinë e Kosovës (AAK) ka refuzuar takimin me presidenten e vendit, Vjosa Osmani, e cila ka ftuar në takim këtë të hënë të gjitha partitë politike për caktimin e datës së zgjedhjeve të jashtëzakonshme për kryetarë të komunave të veriut.
Ndryshe, AAK njofton se ka dalë me një propozim prej 4 pikash për të rikthyer situatën në normalitet në gjithë Kosovën.
Tutje, AAK-ka ka theksuar se derisa nuk do të ketë një reflektim për këto kërkesa, nuk do të jenë pjesë e nismave.
Ndryshe, më 9 nëntor, ministri i Financave, Hekuran Murati u ka bërë thirrje bizneseve që t’i rrisin pagat e punëtorëve.
Ai përmes një postimi në Facebook, ka thënë se është koha që fitimet e shtuara, bizneset t’i ndajnë me ata që ua mundësojnë atë, pasi sipas tij shumica e bizneseve kanë rritur edhe fitimet.
Ai ka thënë se Qeveria e Kosovës do të mbështetë secilin biznes që bën rritjen e pagave për punëtorët duke subvencionuar 50 për qind të rritjes së pagës.
Murati u bën thirrje bizneseve që t’i rritin pagat e punëtorëve