Zyrtarët pakistanezë kanë njoftuar se si pasojë e daljes së një treni nga binarët, të paktën 22 persona kanë vdekur dhe 50 të tjerë janë lënduar.
Zyrtari i lartë policor, Younis Chandio, për mediat lokale ka thënë se kanë filluar operacionet e shpëtimit për t’i nxjerrë njerëzit nga vagonët, duke shtuar se 10 vagonë të trenit janë dalë nga binarët.
Ministri i Hekurudhës i Pakistanit, Khawaja Saad Rafique, ka thënë se “ky është një aksident shumë i madh. Ekipet e shpëtimit kanë mbërritur në vendngjarje”.
Treni ka dalë nga binarët afër stacionit hekurudhor Sahara në qytetin Nawabshah, derisa pamjet e publikuara në rrjetet sociale i shfaqin dhjetëra njerëz në vendngjarje, disa prej të cilëve, duke i thyer dritaret për t’i ndihmuar udhëtarët të dalin nga vagonët e rrokullisur.
Aksidentet dhe daljet e trenit nga binarët ndodhin shpesh në sistemin e vjetruar hekurudhor në Pakistan.
Në qershor të vitit 2021, dy trena janë përplasur mes vete afër Daharkit në Sindh, duke i vrarë të paktën 65 njerëz dhe duke i lënduar rreth 150 të tjerë.
Të paktën 75 udhëtarë u dogjën në një zjarr që e kishte kapluar trenin Tezgam në tetor të vitit 2019, derisa nga përplasja e dy trenave në Ghotkit u vranë më shumë se 100 njerëz në vitin 2005. /REL