Shërbimi i Mbrojtjes Civile në Brazili ka njoftuar për pasojat tragjike të reshjeve të mëdha në shtetin jugor të Rio Grande do Sul. Tetë persona janë raportuar të vdekur, ndërsa 21 të tjerë janë zhdukur si rezultat i përmbytjeve dhe reshjeve intensive të kësaj jave.
Autoritetet kanë raportuar për mbi 1 mijë 400 persona të zhvendosur nga zonat e prekura nga përmbytjet dhe rritja e nivelit të lumenjve.
Kjo katastrofë ka prekur 104 bashki në të gjithë shtetin, duke shkaktuar dëme të mëdha edhe materiale.
Në një raport të publikuar më herët gjatë javës, Qeveria e shtetit paralajmëroi për një rrezik të vazhdueshëm të përmbytjeve në të gjithë territorin e Rio Grande do Sul, duke përfshirë edhe lumenjtë dhe pellgjet e tyre.
Përmbytjet e pritura parashihen të jenë të rënda, veçanërisht në zonat me terren të shkëputur dhe të pjerrët, raporton Reuters.
Guvernatori i shtetit, Eduardo Leite, ka shprehur ngushëllime për familjet e viktimave teksa ka theksuar edhe angazhimin në përpjekjet për të gjetur të zhdukurit.
Ai gjithashtu ka premtuar se qeveria lokale është në punë për të garantuar sigurinë në zonat në rrezik dhe për të ofruar ndihmë për të gjithë të prekurit nga kjo katastrofë natyrore.