Një grup i personave u kanë dalë në pritë studentëve serbë, të cilët kishin planifikuar të shkonin për vizitë në Kompleksin Memorial “Adem Jashari”.
RTV Dukagjini raporton që shumica prej organizatorëve janë tifozë të klubit futbollistik “Drenica”.
Vizita e studentëve realizohet në kuadër të shkollës verore të Universitetit të Prishtinës “Hasan Prishtina”.
Organizatorët e kësaj pritjeje kanë thënë se përgjatë vizitës në Prekaz, nuk do të pranojnë fëmijët e personave që kanë kryer krime në Kosovë.
Një reagim ka ardhur edhe nga “Shqiponjat e Zeza”, tifozët e ekipit futbollistik “Drenica”.
Ky grup i tifozëve thotë se “këmba e studentëve serbë nuk do të shkelë në Prekaz”.
“Nuk duam t’ia dimë sa kohë ka kaluar, nuk duam t’ia dimë as për gjeneratat e reja ‘kurioze’ të tyre, sepse po të ishin aq kurioz për Prekazin do të mjaftonte t’i pysnin familjarët e tyre se si në ato varre prehen shumë pleq, gra, fëmijë e burra të gjakut tonë, të cilët u vranë e u masakruan të pafajshëm!”, kanë shkruar në rrjetin social, Facebook.
Ndër të tjera, tifozët të shtunën e 16 korrikut, kishin paralajmëruar që do t’i dalin zot Prekazit ashtu siç i kanë dalë zot Kosovës, bac Shabani, Hamza e Ademi më 1998.