I dërguari special i Shteteve të Bashkuara të Amerikës (ShBA), Gabriel Escobar, ka deklaruar se ka indikacione pozitive që presidenti serb, Aleksandër Vuçiq, mund ta pranojë planin trepikësh të Bashkimit Evropian janë evidente.
Në një intervistë për Jutarnjilist, Escobar vlerëson se është kryeministri i Republikës së Kosovës, Albin Kurti, ai që duhet bindur pak më shumë.
“Kemi indikacione pozitive se presidenti Vuçiq është i gatshëm ta pranojë, por kryeministri Kurti duhet të bindet pak më shumë”, tha Escobar.
Ky i fundit ka vlerësuar se pala kosovare e njëherit, edhe ajo serbe, mund të humbasin mundësi të shumta në rast të mosplotësimit të kërkesave të BE-së.
“Pasojat nuk janë masa ndëshkuese, por janë mundësi të humbura që do të humbasin të dyja vendet nëse refuzojnë propozimin për dalje nga kriza”, tha Escobar, duke shpjeguar se për Kosovën kjo do të thotë largim nga partnerët e ngushtë ndërkombëtarë dhe largimi i Serbisë nga hyrja në BE.
Escobar ka theksuar se investimi në të ardhmen e Kosovës mbetet i fortë.
Kujtojmë se tri kërkesat e BE-së përfshijnë tërheqjen e njësive speciale, kryerjen e detyrës jashtë objekteve komunale nga ana e kryetarëve të rinj në veri dhe shpalljen e zgjedhjeve të parakohshme në Mitrovicë të Veriut, Zveçan, Leposaviq dhe Zubin Potok.
Pak ditë më parë, i dërguari i Bashkimit Evropian për dialogun Kosovë-Serbi, Miroslav Lajçak ka vizituar Kosovën.
Ai ka thënë se ka mirëkuptim nga pala kosovare për të ecur përpara në tri pikat e prezantuara nga Bashkimi Evropian.