Gjatë ditës së enjte ambasadori gjerman në Kosovë, Jorn Rohde, ka bërë të ditur se shteti gjerman e ka nderuar ministrin sapo dorëhequr nga Ministria e Mbrojtjes, Armend Mehajn, me urdhrin ushtarak “Kryqi i Nderit në Ar”.
Ambasadori gjerman nderon Mehajn me “Kryqin e Nderit” nga Forcat e Armatosura Federale të Gjermanisë
Për këtë ka reaguar edhe vetë Mehaj, i cili ka thënë se është nder të pranohet një vlerësim i tillë nga një shtet partner siç është Gjermania.
“Sot ambasadori i Gjermanisë, z. Jörn Rohde në emër të Ministrit të Mbrojtjes së Gjermanisë, z. Boris Pistorius, më nderoi me urdhrin ushtarak “Cross of honour in gold”. Është vërtetë nder që të pranohet një vlerësim i tillë nga një shtet partner i yni siç është Gjermania. Për më tepër kur theksohet bashkëpunimi i ngushtë, koordinimet dhe qëllimet e përbashkëta në fushën e mbrojtjes dhe sigurisë”, ka shkruar Mehaj në Facebook.
“Ishte nder që në këtë ceremoni të jenë të pranishëm Kryeministri Kurti, ambasadorë të shteteve të QUINT-it, Komandanti i FSK-së, Gjeneral Jashari, Ministri Maqedonci, ambasadori i Bashkimit Evropian, Komandanti i KFOR dhe zyrtarë tjerë ndërkombëtarë e vendorë. Faleminderit për vlerësimin, rruga jonë do të jetë gjithnjë krah për krah njëri tjetrit si partner të besueshëm”, ka përfunduar shkrimin e tij Mehaj.