Forcat Ajrore të Ukrainës thanë më 26 dhjetor se kanë shkatërruar një anije të Flotës ruse në afërsi të Gadishullit të Krimesë, anije që dyshohet se ka bartur dronë, të cilët Moska synonte t’i përdorte në luftën kundër Kievit.
“Rreth orës 02:30 [sipas kohës lokale] më 26 dhjetor, Forcat Ajrore sulmuan me raketa lundruese në zonën e Feodosias avionmbajtësin e madh, Novocherkassk, të Flotës së Detit të Zi të Federatës Ruse”, u tha në njoftimin e Forcave Ajrore ukrainase të publikuar në Telegram.
Feodosia është shtëpi e një baze të madhe detare të Gadishullin e pushtuar të Krimesë.
Në një njoftim paraprak nga autoritetet ukrainase u tha se Novocherkassk u “shkatërrua”, duke shtuar se “njerëzit thonë se po transportonte Shahed” – duke iu referuar dronëve kamikazë iranianë, që Rusia rregullisht i përdor kundër Ukrainës.
Komandanti i Forcave Ajrore ukrainase, Mykola Olechtchouk, ka publikuar një video ku shihet një shpërthim në bazën detare ruse në Feodosia, shkruan REL.
Sergey Aksyonov, kreu i Krimesë që mbështetet nga Kremlini, tha se “një sulm i armikut është kryer në zonën e Foedosias”.
“Zona e portit është mbyllur për qarkullim”, tha ai.
“Deri më tani, shpërthimet janë ndalur dhe zjarri është lokalizuar. Të gjitha shërbimet relevante janë në vendin e ngjarjes. Banorët e disa shtëpive janë evakuuar”, shtoi ai në postimin e publikuar në Telegram.
Ukraina, që po përballet me pushtimin rus që nga shkurti i vitit të kaluar, shpesh sulmon caqe në Krime, veçmas ato të ushtrisë ruse.
Në prill të vitit 2022, Kievi sulmoi luftanijen Moskva të Flotës së Detit të Zi.