Presidentja e Komisionit Evropian, Ursula von der Leyen, të enjten e 27 tetorit do të jetë për vizitë zyrtare në Kosovë.
Von der Leyen do të pritet në takim nga presidentja e Kosovës, Vjosa Osmani duke filluar nga ora 09:00.
Pastaj duke filluar nga ora 10:15 ajo do të pritet në takim edhe nga kryeministri, Albin Kurti.
Për këtë vizitë edhe Policia e Kosovës ka njoftuar se do të ketë ndërprerje të përkohshme të qarkullimit të automjeteve në disa segmente rrugore.
“Për të mundësuar qarkullim të lirë të eskortës zyrtare nën përcjellje dhe sigurim sipas itinerarit të lëvizjes, Policia e Kosovës do të bëjë ndërprerje të përkohshme të qarkullimit të trafikut (në intervale të shkurta kohore), të disa segmenteve rrugore drejt kryeqytetit, ku pritet të kalojë eskorta”, thuhet në njoftimin e Policisë.
Kjo vizitë vjen në kuadër të vizitave të shefes së Komisionit Evropian në vendet e Ballkanit Perëndimor.
Në të njëjtën ditë, të enjten e 27 tetorit, von der Leyen do ta vizitojë edhe Tiranën.
Von der Leyen do ta vazhdojë turneun në Sarajevë më 28 tetor dhe në Beograd. Këtë turne nëpër gjashtë vendet e Ballkanit Perëndimor presidentja e Komisionit Evropian do ta përmbyllë me vizitë në Mal të Zi të shtunën e 29 tetorit.
Von der Leyen në rajon do të diskutojë me bashkëbiseduesit e saj për bashkëpunimin rajonal, reformat evropiane, gjetjet e raporteve të fundit të progresit dhe për sfidat e përbashkëta, siç janë edhe menaxhimi i migracionit dhe përballja me rritjen e çmimeve të energjisë dhe ushqimit, shkruan REL.
Një temë tjetër diskutimi do të jetë edhe agresioni i Rusisë ndaj Ukrainës dhe pasojat e kësaj lufte, si për Ballkanin, ashtu edhe për Evropën.
Ndërkaq, samiti i ardhshëm ndërmjet Ballkanit Perëndimor dhe Bashkimit Evropian do të mbahet më gjashtë dhjetor të vitit 2022, në Tiranë.