Ministrja për Evropën dhe Punët e Jashtme në Shqipëri(MEPJ), Olta Xhaçka, të dielën e 14 majit, ka marrë pjesë në takimin jozyrtar dy ditor të Këshillit të Atlantikut të Veriut (NACC), në format të Ministrave të Jashtëm, i cili është mbajtur në Berlin.
Përmes një postimi në Facebook, Xhaçka ka thënë se ky takim i paraprin samitit të NATO-s, në fund të muajit qershor në Madrid (Spanjë), temë kryesore kishte luftën në Ukrainë, pasojat e agresionit rus mbi sigurinë e Aleancës Veri Atlantike, anëtarësimin e Finlandës dhe Suedisë, si dhe konceptin strategjik të NATO-s.
Sa i përket situatës në Ukrainë, ministrja Xhaçka ka thënë se bashkimi është çelësi i sigurisë kolektive të aleancës, ndërsa në vijim të mbështetjes që Shqipëria i ka dhënë Ukrainës, bëri me dije se Shqipëria do të jetë pjesë e grupit të ri të luftimit në Bullgari.
“Të gjithë do të bëjmë gjithçka që mundemi që t’i japim Rusisë mesazhin e aleancës së bashkuar”, është shprehur kryediplomatja shqiptare, ka raportuar A2 CNN.
Për të, NATO duhet të vijojë politikën e dyerve të hapura për vendet e tjera të Ballkanit Perëndimor, përfshirë edhe Kosovën e cila ndan të njëjtat vlera, si një kontribut i sigurisë së Evropës në tërësi.
Ministrja Xhaçka, gjithashtu, ka theksuar mbështetjen për anëtarësimin e Finlandës dhe Suedisë në NATO.
“Konfirmova se Shqipëria do të jetë pjesë e grupit të ri të luftimit në Bullgari. Nëse të gjithë bëjmë më të mirën, mund t’i japim Rusisë mesazhin e aleancës së bashkuar. Përsërita mbështetjen tonë për anëtarësimin e Finlandës dhe Suedisë në NATO”, ka shkruar Xhaçka.
