Presidenti i Ukrainës, Volodymyr Zelensky, përmes një video të shpërndarë në rrjetin e tij social Facebook, ka thënë se Ukraina ka eksportuar mbi një milionë tonë produkte bujqësore përmes detit gjatë muajit të fundit.
“Nisma e eksportit të grurit ka funksionuar për gati një muaj dhe gjatë kësaj kohe, milionat e parë të produkteve ushqimore që nga 24 shkurti u eksportuan nga tri portet tona detare në Chornomorsk, Odesa dhe Yuzhne”, ka thënë Zelensky.
Sipas Zelenskyt, Ukraina ka qenë dhe do të mbetet gjithmonë ndër garantuesit e sigurisë globale të ushqimit.
Ai ka shtuar se ky eksport, jo vetëm që është i rëndësishëm për sigurinë e ushqimit, por gjithashtu siguron edhe vende të reja pune për qytetarët.
“Drithërat ukrainase dhe vetë fakti që furnizimet tona në tregun botëror të ushqimit kanë funksionuar, bëjnë të mundur parandalimin e kaosit në treg, uljen e ashpërsisë së krizës ushqimore dhe parandalimin e mungesave katastrofike”, ka shtuar Zelensky.
Zelensky shprehet mirënjohës, sepse ky rezultat i eksportit ka qenë shumë i rëndësishëm si për Ukrainën, ashtu edhe për gjithë botën.