Një zyrtare e lartë e Qeverisë së Francës, Lawrence Boone, të mërkurën e 16 nëntorit ka mbajtur njëkonferencë të përbashkët me kryeministrin e Maqedonisë së Veriut, Dimitar Kovaçevski, në Shkup.
Boone, teksa është pyetur lidhur me propozimin franko-gjerman nëse i njëjti mbështetet “bazuar në vendimin politik për të bombarduar Jugosllavinë apo në ligjin ndërkombëtar”, ka thënë se ky plan është një “non-paper”.
Sipas saj, kjo është edhe arsyeja e mospublikimit të përmbajtjes së këtij plani.
“Një non-paper është një non-paper dhe përmbajtja e tij nuk zbulohet” ka thënë ajo, shkruan N1.
Ndryshe, Bashkimi Evropian ka pranuar përgjigjet e Kosovës dhe Serbisë për propozimin franko-gjerman për të bërë përparim konkret në normalizimin e marrëdhënieve në mes të dy palëve.
Kështu ka konfirmuar për Portalin Dukagjini, zëdhënësi i Bashkimit Evropian për Politikë të Jashtme dhe Siguri, Peter Stano.
“BE-ja, e mbështetur nga Franca dhe Gjermania, u ka paraqitur një propozim palëve për të bërë përparim konkret dhe të pakthyeshëm në rrugën drejt normalizimit të gjithanshëm të marrëdhënieve të tyre”, thuhet në përgjigjen e BE-së.
Ai tutje ka shtuar se duhet të ulen tensionet në mes të Kosovës dhe Serbisë, teksa ka shtuar se BE është mirënjohëse për mbështetjen e Gjermanisë dhe Francës për këtë propozim.
“Tashmë kemi marrë përgjigjet nga të dyja palët dhe jemi duke i studiuar. Ne i bëjmë thirrje Kosovës dhe Serbisë që ta shfrytëzojnë këtë mundësi dhe të bëjnë një hap historik përpara në normalizimin e marrëdhënieve të tyre, gjë që është thelbësore për ta për të avancuar në rrugën e tyre evropiane”, ka thënë më tutje Stano.
Ndërkaq, kryeministri i Kosovës, Albin Kurti i pyetur nga gazetarët për planin franko-gjerman ka thënë se është një hap në drejtim të duhur pasi konceptet dhe nocionet që përdoren janë vlera në dallim prej dakordimeve të mëhershme që ishin ideologji e zgjidhjes së problemeve.
“Tashmë nuk jemi te ajo, tash jemi te vlerat, e kam vlerësuar këtë propozim si hap në drejtim të duhur”, gjersa ka shtuar se ky plan ka mbështetjen e Brukselit dhe të Ëashingtonit.
Ndërsa, ai ka thënë se ky plan është refuzuar nga Beogradi pas mbledhjes së Këshillit të Sigurisë të mbajtur nga ata që tentojnë të shndërrojë destabilizim e pasiguri në Kosovë.
“Qëllimi i Beogradit nuk është për të mos e pranuar planin, është për të maskuar refuzimin e planit, i bëjnë këto drama për të kamufluar”, ka deklaruar ai.
Portali Dukagjini ka kërkuar nga ana e BE-së detaje lidhur me qëndrimin e Serbisë për këtë plan, por sipas STANO-s, kjo përgjigje u takon autoriteteve në Serbi.
Ndërkaq, presidenti i Serbisë, Aleksandër Vuçiq për propozimin franko-gjerman kishte deklaruar se “është e papranueshme për Serbinë”, por shtoi se “është e papërgjegjshme dhe joserioze që propozimi franko-gjerman të hidhet nga dritarja”.