200 trupa britanike kanë mbërritur në Kosovë.
Këtë e ka njoftuar NATO duke thënë se ky dislokim vjen pas sulmit terrorist ndaj Policisë së Kosovës më 24 shtator në fshatin Banjskë të Komunës së Zveçanit.
“Kontingjenti i parë prej dyqind ushtarësh britanikë mbërriti në Kosovë të premten (6 tetor 2023) për të përforcuar misionin paqeruajtës të Forcave të NATO-s në Kosovë (KFOR). Dislokimi vjen pas sulmit të dhunshëm ndaj Policisë së Kosovës më 24 shtator dhe rritjes së tensioneve në rajon”, ka njoftuar NATO.
Në njoftimin e NATO-s thuhet se këto dislokime janë një hap i kujdesshëm për të siguruar që KFOR-i të ketë forcat që i nevojiten për të përmbushur mandatin e tij të OKB-së, për të ruajtur një mjedis të sigurt dhe lirinë e lëvizjes për të gjithë njerëzit në Kosovë.
“NATO ka udhëhequr një operacion paqeruajtës në Kosovë që nga viti 1999 në përputhje me mandatin e saj sipas Rezolutës 1244 të Këshillit të Sigurimit të Kombeve të Bashkuara. KFOR-i aktualisht përbëhet nga mbi 4,500 trupa të kontribuar nga 27 aleatë dhe partnerë të NATO-s”, thuhet tutje në njoftim.