22 nëntori është Dita kombëtare e alfabetit shqip.
Shtëpia botuese “Dukagjini”, ka nderin të jetë pjesë e projektit të Abetares së unifikuar, të cilën e konsideron vlerë kombëtare për edukimin e të vegjëlve.
Abetarja paraqitet si paketë e kompletuar, e përbërë nga: Libri i nxënësit, Fletorja e punës, Libri i mësuesit dhe versioni digjital i Librit të nxënësit.
Njashtu, në versionin digjital, nxënësit përmes interaktivitetit mund t’i shikojnë videot e njësive mësimore, t’i shkruajnë shkronjat, t’i zgjidhin detyrat e dhëna dhe të marrin përgjigje automatike për saktësinë e tyre.
Vlen të theksohet, se Abetarja e unifikuar është rezultat i bashkëpunimit të dy ministrive të arsimit, asaj të Kosovës dhe asaj të Shqipërisë, si dhe dy shtëpive botuese “Dukagjini” dhe “Pegi”.
Kujtojmë se, në këtë ditë të vitit 1908, në Manastir, ishin mbledhur 150 delegatë nga të gjitha krahinat shqiptare, për t’u bërë pjesë e një ngjarjeje të rëndësishme historike që sot njihet si Kongresi i Alfabetit. Aty u mor një vendim i rëndësishëm për gjuhën shqipe, njësimi i alfabetit shqip, që, për kohën, nuk ishte vetëm problem gjuhësor, por edhe politik gjithashtu.
Prandaj, data 22 nëntor u bë simbol i bashkimit të shqiptarëve, sepse gjuha është gurthemeli i një identiteti nacional dhe gjithmonë është parë si mjeti kryesor për ruajtjen e një identiteti të tillë.