Policia e Kosovës (PK) ka filluar punën më 6 shtator të vitit 1999, ndërsa tani po shënon 23-vjetorin e themelimit të saj.
Misioni i Organizatës për Bashkëpunim dhe Siguri në Evropë (OSBE), ishte përkujdesur që në Kosovë, në pajtim me rezolutën e Kombeve të Bashkuara 1244, ta hapë Shkollën e Policisë, ku edhe ka filluar trajnimin e kadetëve të parë.
Gjenerata e parë e pjesëtarëve të Policisë së Kosovës kishte gjithsejt 176 pjesëtarë, të cilët pas trajnimit i shërbyen vendit si policët e parë në territorin e Kosovës.
Ata zhvillonin patrullime të përbashkëta me policinë e Misionit të Kombeve të Bashkuara në Kosovë (UNMIK), të cilëve edhe u përgjigjeshin, dhe me ushtarët e NATO-s në Kosovë.
Policia e Kosovës numëron gjithsej pesë departamente; të operacioneve, të hetimeve, kufijve, shërbimeve mbështetëse dhe atë të burimeve njerëzore.
Kosova ka mbi 9 mijë zyrtarë policorë, ndërsa vetëm 15 % prej tyre janë gra.
Dy vite më parë, Kosova është renditur e dhjeta për nga numri i policëve, që ka 439 policë për 100 mijë banorë.
Në nivel qendror, në kuadër të Divizionit të Sigurisë Publike funksionojnë ndaras dy (2) drejtori të cilat dallojnë për nga detyrat dhe orientimi i aktiviteteve policore; Drejtoria për Planifikim dhe Vlerësim Operacional dhe Drejtoria e Policimit në Bashkësi dhe Preventivë.
Ndërsa, në nivel lokal ka gjithsej tetë Drejtori Rajonale me gjithsej dyzet (40) stacione policore: Prishtinë, Prizreni, Gjilani, Ferizaj, Pejë, Gjakovë, Mitrovicë e Jugut dhe Mitrovicë e Veriut.
Policia e Kosovës, që nga themelimi është institucioni më i rëndësishëm shtetëror që kujdeset për mbrojtjen dhe sigurin e rendit në vend.
Përmes një njoftimi, Policia e Kosovës ka bërë të ditur edhe agjendën e aktiviteteve të saj për shënimin e 23-vjetorit të themelimit.