Katër astronautë u kthyen në Tokë në një kapsulë të SpaceX Dragon Crew të premten, duke i dhënë fund misionit të tyre gati gjashtëmujor në Stacionin Ndërkombëtar të Hapësirës (ISS) me një zbritje në Oqeanin Atlantik pranë Floridës me ndihmën e parashutave.
Kapsula e quajtur “Freedom” u nis nga Stacioni Ndërkombëtar Hapësinor dhe u hodh me parashutë në oqean, pranë Jacksonville, Florida, rreth pesë orë më vonë, njofton DW.
Ajo mbante tre amerikanë, astronautët e NASA-s Kjell Lindgren, Bob Hines dhe Jessica Watkins – gruaja e parë zezake që përfundoi një fluturim afatgjatë në hapësirë - dhe italianen Samantha Cristoforetti e Agjencisë Evropiane të Hapësirës.
Ekipi është quajtur “Crew-4”, ekuipazhi i katërt me kohë të plotë i astronautëve të sjellë në ISS nga SpaceX që kur kompania private e raketave e themeluar nga Elon Musk filloi të fluturonte me personelin e NASA-s në maj të viti2020.
Ashtu si me shumicën e ekuipazheve të ISS, roli i tyre kryesor ishte i bazuar në shkencë dhe përfshinte eksperimente të shumta dhe demonstrime teknologjike.
Një javë para daljes së Crew-4, ekipi i tyre zëvendësues Crew-5 mbërriti në stacion – një kozmonaut rus , një astronaut japonez dhe dy anëtarë të ekuipazhit të NASA-s, duke përfshirë gruan e parë vendase amerikane në orbitë.
Crew-5 po qëndron në ISS me dy rusë të tjerë dhe një amerikan të tretë që ndau një fluturim Soyuz për në ISS në shtator.