Në takimin e Këshillit Gjyqësor i Kosovës (KGJK), që është mbajtur të hënën e shtatë nëntorit, kanë marrë pjesë kryetari i Gjykatës Supreme, kryetari i Gjykatës së Apelit dhe nënkryetari i Gjykatës Themelore në Mitrovicë, në prezencë të partnerëve ndërkombëtarë, është diskutuar për mbarëvajtjen e punës në sistemin gjyqësor.
“Këshilli ka kërkuar nga kryetarët e gjykatave dhe Drejtori i Përgjithshëm i Sekretariatit të KGJK-së që ta vlerësojnë gjendjen e krijuar dhe si autoritete kompetente në kuadër të gjykatave të tyre të ndërmarrin të gjitha masat e nevojshme dhe të paraqesin në Këshill propozimet e nevojshme për mirë funksionimin e punës në gjykata pa ndërprerje. Të njëjtit janë zotuar se puna në gjykata do të vazhdojë dhe njëkohësisht do të informohet Këshilli me raporte të veçanta për secilin rast”, njofton Këshilli Gjyqësor i Kosovës (KGJK).
Tutje në njoftim thuhet se KGjK nuk ka shqyrtuar dorëheqjet e gjyqtarëve dhe të punonjësve mbështetës në takimin e sotëm sepse do të ketë raport vlerësimi nga autoritetet kompetente për përgjegjësinë e të gjitha subjekteve të përfshira në aktivitetet e fundit që ndërlidhen me situatën e krijuar.
“Këshilli mbetet i përkushtuar që të koordinojë veprimet me institucionet vendore dhe ndërkombëtare për garantimin e sundimit të ligjit dhe zbatimin e Kushtetutës dhe ligjeve të zbatueshme në Republikën e Kosovës”, thuhet mes tjerash në njoftimine KGjK-së.
Tutje thuhet se Këshilli Gjyqësor i Kosovës ka kërkuar nga Qeveria e Kosovës dhe policia që të vlerësojnë situatën e sigurisë dhe të ofrojnë siguri për punonjësit dhe objektet në Mitrovicën Veriore, Zubin Potok dhe Leposaviq.