Për herë të dytë në brenda pak orësh, aktivisti i ORCA-s, Rron Gjinovci, ka reaguar sërish pas lirimit me procedurë të rregullt.
Të hënën e 14 nëntorit, aktivistët e ORCA-s, Dibran Hoxha dhe Rron Gjinovci, janë arrestuar pas aksionit simbolik ndaj plagjiatorëve të shpallur nga Këshilli i Etikës në Fakultetin Filozofik.
Gjinovci, përmes një postimi në Facebook, ka thënë se bashkë me Hoxhën, u arrestuan si të ishin kriminelë, ndërsa sipas tij plagjiatori mbeti para studentëve duke ligjëruar.
Ai ka theksuar se nuk do të ndalen dhe do të vazhdojnë të pengojnë normalizimin e plagjiaturës.
Kjo për të është vetëm një fillim.
“Na arrestun neve e na largun nga Fakulteti si kriminela të prangosun. Plagjiatorin e lanë para studentëve tu “dhanë mësim”.
Por na s’e kena njet mu nalë. Nuk kemi me leju normalizimin e plagjiaturës. Kjo e sodit është veç fillimi”, ka shkruar Gjinovci.
Ndryshe në njoftimin e ORCA-s thuhet se në të gjitha rastet kur institucionet tregohen të paafta për t’i jetësuar vendimet meritore ndëshkuese për kryesit e shkeljeve, “ORCA do të reagojë duke iu pamundësuar kryesve aktivitetin e tyre të përditshëm normal”.
“Pasi procedurat për vendimin përfundimtar për rastin e plagjiaturës Bujar Dugolli dhe Ardian Kastrati po marrin kohë siç ndodh rëndon në Universitetin e Prishtinës, kemi vendosur që nga tash e tutje të kalojmë në aktivizëm gueril”, thuhet në njoftim.
Tutje thuhet se është jonormale që një profesor i dënuar për plagjiaturë të vazhdojë të shfaqet para studentëve.
“Ne u arrestuam, por do të vazhdojmë luftën kundër plagjiaturës”.