Administrata Tatimore e Kosovës (ATK), nuk ka dhënë ndonjë datë se kur do të hapet aplikimi që qytetarëve u mundëson përfitimin e 100 eurove.
Për RTV DUKAGJININ, nga ky institucion, kanë konfirmuar se, janë duke e përgatitur dizajnimin e sistemit, dhe se janë duke punuar edhe në aplikacion. Por, sipas tyre, ditën e hapjes së aplikimit e vendos Ministria e Financave e jo ata.
Nga ATK-ja kanë bërë të ditur se, deri në fund të ditës, ata do të jenë gati, por, kanë ripotencuar se është Ministria e Financave ajo që vendos se kur do të kenë mundësi qytetarët të aplikojnë për 100 eurot e tyre.
Më 12 prill të këtij viti, Kryeministri i Kosovës, Albin Kurti, kishte njoftuar se, për muajin prill do të ndahen nga 100 euro, për studentët, pensionistët si dhe për punëtorët e sektorit privat dhe publik.
Kurti, po ashtu, kishte deklaruar se, për pensionistët dhe punëtorët e sektorit publik, shtesa prej 100 euro për muajin prill mund të ekzekutohet menjëherë, ndërkaq për punëtorët e sektorit privat dhe studentët, nevojitet që të hapet procesi i aplikimit.