Një laborator i kultivimit të substancane narkotike është shkatërruar të martën e 19 prillit në komunën e Zveçanit.
Kështu është bërë e ditur nga ministri i Punëve të Brendshme, Xhelal Sveçla, i cili përmes një postimi në llogarinë e tij në Facebook, ka thënë se lidhur me rastin janë arrestuar katër persona.
“Sapo është shkatërruar laboratori i radhës i kultivimit të substancave narkotike në Komunën e Zveçanit. Deri tash, nga Policia e Kosovës në vendin e ngjarjes janë sekuestruar mbi dy mijë fije kanabis, janë arrestuar tre shtetas serb të Serbisë dhe një shtetas serb i Kosovës”, ka shkruar Sveçla.
Ndryshe, më 16 shkurt të këtij viti, ishte zhvilluar një operacion anti-drogë në rajonin e Suharekës.
Ky operacion nga Prokuroria Themelore e Prizrenit, kishte për cak një grup të personave të cilët prodhonin marihuanë në fshatin Shirokë të komunës së Suharekës.
Prokuroria e Prizrenit kishte kërkuar caktimin e masës së paraburgimit nga Gjykata Themelore në Prizren, ndaj gjashtë të pandehurve, të arrestuar në aksionin anti-drogë në Shirokë të Suharekës.
Sipas kërkesës së prokurorisë, të pandehurit kanë kultivuar bimën e hashashit, shkurres së kokainës ose bimën e kanabisit, me qëllim të prodhimit të narkotikeve ose substancave psikotropike, në atë mënyrë që në bashkëkryerje me njëri – tjetrin kanë kultivuar bimën narkotike brenda një objekti që ka shërbyer si mulli në fshatin Shirokë – Komuna e Suharekës, dhe atë në katin e 7-të.
Me këto veprime, të pandehurit kishin për të kryer veprën penale – kultivimi i bimës se hashashit, shkurres së kokainës ose bimëve të kanabisit.