Ministri i Kulturës, Rinisë dhe Sportit, Hajrullah Çeku, ka reaguar për veprimin e kombëtares së Serbisë, futbollistët e së cilës kishin vendosur hartën e Kosovës në flamurin serb.
Ai ka thënë se këto imazhe të turpshme shfaqin mesazhe urrejtje, ksenofobike dhe gjenocidiale ndaj Kosovës duke shfrytëzuar platformën e FIFA-s.
“Pamje të turpshme nga zhveshtorja e Serbisë, duke shfaqur mesazhe urrejtjeje, ksenofobie dhe gjenocidale ndaj Kosovës, teksa shfrytëzojnë platformën e Kupës Botërore”, ka shkruar Çeku në Twitter.
Ai theksoi se pret veprime konkrete nga FIFA pasi Federata e Futbolli të Kosovës është një anëtare me të drejtë të plota në FIFA dhe UEFA.
“Presim veprime konkrete nga FIFA duke marrë parasysh se FFK-ja është anëtar i plotë i FIFA-s dhe UEFA-s”, ka shtuar Çeku.
FFK paraqet ankesë në FIFA për vendosjen e hartës së Kosovës në flamurin e Serbisë
Para ndeshjes me kombëtaren e Brazilit, në zhveshtoren e kombëtares së Serbisë është vendosur një flamur, ku shihej harta e Kosovës me ngjyrat e flamurit serb, me mbishkrimin “Nuk ka dorëzim”.
Gjithashtu Federata e Futbollit e Kosovës, ka paraqitur ankesë në FIFA për veprimin e kombëtares së Serbisë, futbollistët e së cilës e kishin vendosur hartën e Kosovës në flamurin serb.