Një grua shtatzënë, 35-vjeçare, është vrarë të mërkurën rreth orës 18:00, në oborrin e Klinikës së Gjinekologjisë, në QKUK, në Prishtinë.
Ajo dyshohet të jetë privuar nga jeta nga bashkëshorti i saj. Për këtë të fundit, Kallxo.com zbulon se i dyshuari kishte aktakuzë për kanosje më 10 gusht të këtij viti, në Gjykatën e Ferizajt.
Motra e gruas shtatzënë, e cila u vra në oborrin e QKUK-së, këtë të mërkurë, ka bërë të ditur se për rastin e saj, Policia e Kosovës ka qenë në dijeni që katër muaj.
Në gjendje të rëndë emocionale e mes lotësh, Mirushe Lohaj, u shpreh se të martën, familjarët e burrit, i cili dyshohet se e ka vrarë gruan e tij, e kanë lutur të kthehet në shtëpi.
Ajo theksoi se nga mediat e ka mësuar për rastin tragjik, ku mbeti e vrarë motra e saj shtatzënë.
“Rastin atë natë e kemi lajmëruar dhe mjekëve, na kanë thënë në dorë tonë është… Policia që katër muaj e di që u nda prej tij, e kanë ditur gjendjen e saj si e ka. Nuk ka treguar asgjë. E kemi vizituar, dje kemi qenë e kemi vizituar, kanë qenë vjehrra e saj dhe kunata, as nuk i kemi folur, ajo i thoshte ktheu për hatër të fëmijëve. Në lajme e kemi kuptuar, kemi ardhur këtu që policia”, ka thënë ajo.
Se tashmë e ndjera kishte kërkuar ndihmë e ka konfirmuar edhe Ministria e Drejtësisë.
Nazlie Bala nga Ministria e Drejtësisë, në Radio Dukagjini, ka thënë se gruaja shtatzënë, e cila u vra këtë të mërkurë, kishte kërkuar ndihmë edhe më parë në institucione përkatëse.
Bala tha se institucionet e sigurisë duhet ta shtojnë përgjegjshmërinë, dhe viktimave të dhunës t’u jepet përkrahja e plotë.