I dyshuari për vrasjen e 35-vjeçares shtatzënë ishte vetvrarë të premten, njoftoi Ministri i Brendshëm, Xhelal Sveçla.
Raporti 24-orësh i Policisë së Kosovës ka dhënë detaje rreth asaj se çka gjeti PK në vendngjarje gjersa theksoi se gjatë intervenimit është arritur që të largohen anëtarët e familjes nga shtëpia, ndërsa i dyshuari nuk ka pranuar negocimin me policinë dhe i njëjti, ka qëlluar veten me revole.
‘Vdekjen e viktimës e ka konstatuar ekipi mjekësor. Në vendin e ngjarjes është gjetur dhe konfiskuar një pistoletë me një karikator pa fishekë dhe një predhë. Përveç njësive të nevojshme policore në vendin e ngjarjes ka dalë edhe prokurori”, thuhet në raport.
Krahas kësaj, bëhet e ditur se me vendim të prokurorit, trupi i pajetë është dërguar në IML për obduksion.
35-vjeçarja shtatzënë ishte privuar nga jeta të mërkurën e 30 nëntorit. I dyshuari që ishte bashkëshorti i saj ishte në arrati para se të vriste veten, të premten.