Është mbajtur Forumi Ekonomik në mes të Kosovës dhe Austrisë, me qëllim kryesor, promovimin e bizneseve të të dyja vendeve dhe nxitjen e investimeve nga kompanitë austriake në Kosovë.
I pranishëm në këtë forum ishte edhe Kryeministri i Kosovës, i cili ka falënderuar shtetin austriak, duke thënë se ky shtet është ndër partnerët kryesore në aspektin politik dhe atë ekonomik.
“Kosova është falënderuese për qeverinë austriake në shumë sfera, ajo mbetet ndër partneret më të rëndësishëm në aspektin ekonomik dhe politik. Kam kënaqësinë nën organizmin e ministrisë, shumë kompani të suksesshme nga Austria do të takohen me bizneset kosovare dhe do t’i shkëmbejnë përvojat dhe do të bashkëpunojnë”, ka deklaruar Kurti.
Më tej, Kurti, ka kërkuar nga shteti austriak ndihmë për një ekspertizë teknike për ndërtimin e hekurudhës Prizren-Durrës.
Ambasadori austriak në Kosovë, Christoph Weidinger, ka thënë se, ky forum ka për qëllim mbështetjen e bizneseve për ta rikuperuar ekonominë, pas ndikimit negativ që kishte pandemia Covid-19.
Sipas, ambasadorit Weidinger, Austria është donatori më i madh në Kosovë, për investime në arsimin e lartë. Ai, po ashtu, bëri të ditur se, shteti austriak është i interesuar që me Kosovën të kenë bashkëpunim në të gjitha sferat, e sidomos për fuqizimin e gruas.
Ai është shprehur se Austria, ka qenë dhe mbetet përkrahëse që Kosova të anëtarësohet në Bashkimin Evropian si dhe të ketë liberalizim të vizave.
“Me Austrinë që është investitori i katërt më i madh, forumi ekonomik do t’i fuqizojë raportet mes ndërmarrjeve nga Kosova dhe Austria, dhe do të ndikojë për mirë në të dyja vendet. Austria gjithmonë ka mbështetur Kosovën, për anëtarësim në BE dhe po ashtu për liberalizim të vizave”, ka deklaruar ai.
Ambasadori austriak, ka treguar se të enjten pasdite, një delegacion austriak do ta vizitojë Kosovën.