Të premten e 16 dhjetorit, ka pasur alarm për bomba në disa lokacione, ndër to edhe në aeroportin e Shkupit, gjë që ka bërë që të anulohen të gjitha fluturimet.
Fluturimet u anuluan për shkak se u raportua për një mjet shpërthyes të vendosur në aeroportin e Shkupit.
Pas një raportimi të tillë, po bëhet evakuimi i punonjësve dhe pasagjerëve.
Ditëve të fundit ka pasur kërcënime me bomba, të cilat synojnë institucionet, shkollat fillore dhe të mesme, qendrat tregtare dhe ndërtesat e banimit.
Siç shkruan portali i AlsatM, gjatë të premtes, është thënë se në hotelin “Aleksandar Palas” dhe në Qendrën Tregtare “East Gate”, janë vendosur alarme për bomba.
Ndryshe, nga hoteli janë evakuuar të gjithë mysafirët dhe të punësuarit, është anuluar edhe konferenca vjetore e Odës ekonomike, në të cilën do të merrte pjesë edhe kryeministri i vendit, Dimitar Kovaçevski.
Vetëm gjatë të enjtes së 15 dhjetorit, janë raportuar 49 bomba të vendosura, mes tyre edhe në shkollat në Kavadar.