Kryetari i Lidhjes Demokratike të Kosovës Lumir Abdixhiku, ka thënë se skandali financiar që e lidhë Ambasadorin e Kosovës Martin Berishaj, është një nga arsyet se pse ekzekutivi po e bllokon themelimin e komisionit hetimor për energji.
Sipas Abdixhikut hetimi parlamentar duhet të ndodhë domosdoshmërisht.
“Vetëm një hall i madh prodhonte arsyetime të pashpresa si këto. Por sa më i zëshëm refuzimi i tyre, aq më i domosdoshëm bëhej insistimi ynë. Sot, hetimi parlamentar nuk ka alternativë. Ky skandal, dhe të tjera skandale të renditura në shpenzimin e plot 120 milionë eurove edhe shtrenjtimin e faturave deri në 100%, duhet të gjejnë dritë”, ka thënë ai.
Tutje, ai bëri të ditur se do të vazhdojnë ta bojkotojnë çdo votim në seanca të kuvendit apo edhe komisione, deri sa të themelohet komisioni hetimor.
“Kriza energjetike është një piramidë keqmenaxhimi, neglizhence e tani dhe krimi. Këtë piramidë duhet dhe do ta shembim të gjithë. Bojkoti ynë votues në Kuvend, nuk merr fund pa formimin e Komisionit Hetimor për Energji. Sepse s’ka ligj, s’ka temë e s’ka çështje tjetër më me rëndësi se sa kjo me energji. Do ta zbardhim të vërtetën herët apo vonë”, ka shtuar kryetari i LDK-së.
I pari i LDK-së, tha se shkarkimi i ambasadorit Martin Berishaj, duhet të ndodhë menjëherë.