Është kërkuar caktimi i masës së paraburgimit ndaj të pandehurës N.A nga Prokuroria Themelore në Prizren, për të pandehurën e cila mbrëmjen e së martës pranoi para Policisë së Kosovës se kishte kryer vrasjen 67-vjeçares në fshatin Kuk të Dragashit.
Sipas njoftimit, bazuar në kërkesën e Prokurorisë, e pandehura N.A., me dashje ka privuar nga jeta anëtaren e familjes – motrën e bashkëshortit të saj. E njëjta ishte goditur disa herë në kokë dhe në pjesë të ndryshme të trupit.
“Prizren, 28 dhjetor 2022- Prokuroria Themelore në Prizren, Departamenti i Krimeve të Rënda, ka kërkuar caktimin e masës së paraburgimit nga Gjykata Themelore në Prizren, kundër të pandehurës N.A., për shkak dyshimit të bazuar se e njëjta ka kryer veprën penale “Vrasje e rëndë” nga neni 173 paragrafi 1, nënparagrafi 1.3, të Kodit Penal të Republikës së Kosovës (KPRK). Sipas kërkesës së prokurorisë, e pandehura N.A., me dashje ka privuar nga jeta anëtaren e familjes – motrën e bashkëshortit të saj, me të cilën ka bashkëjetuar në ekonomi të përbashkët familjare, në atë mënyrë që me datë 23.12.2022, rreth orës 10:00, derisa e ndjera ishte e shtrirë në njërën nga dhomat e shtëpisë, e pandehura me anë të një shkopi prej druri të modifikuar e godet disa herë viktimën në kokë dhe në pjesë të ndryshme të trupit duke i shkaktuar gjakderdhje në tru, dhe si pasojë e këtij lëndimi e njëjta ka ndërruar jetë me datë 26.12.2022, rreth orës 05:30”, thuhet në njoftim.
Policia e Kosovës ka njoftuar mbrëmjen e së martës se e dyshuara për vrasjen e të moshuarës në Dragash, e ka pranuar se e ka kryer vrasjen e 67-vjeçares.
Sipas Policisë, ajo këtë veprim e ka bërë duke përdorur mjete të ndryshme të forta, të cilat më pas i ka fshehur.