Ambasada e Shteteve të Bashkuara të Amerikës në Kosovë ka dalë me një sqarim lidhur me pëlqimin që i ka bërë një postimi në Twitter, në të cilin Aleksandër Vuçiq ka thënë se nëntë shtete e kanë tërhequr njohjen ndaj Kosovës.
Në sqarimin e Ambasadës thuhet se postimi nuk është pëlqyer qëllimisht, dhe thuhet se janë duke e shqyrtuar situatën për të përcaktuar se çfarë ka ndodhur.
Ndër të tjera, Ambasada ka theksuar se kur ka një pozicion e shpreh përmes deklaratave zyrtare, jo nga ‘Like-t’.
“Llogaria zyrtare në Twitter e Ambasadës së SHBA-së nuk ka ‘pëlqyer’ qëllimisht asnjë postim në Twitter gjatë 24 orëve të fundit. Ne po shqyrtojmë situatën për të përcaktuar se çfarë ka ndodhur. Siç u theksua më parë: kur kemi një pozicion për të artikuluar, ne e bëjmë këtë nëpërmjet deklaratave zyrtare – jo nga një ‘like’ e mediave sociale”, thuhet në deklaratë.
Ambasada në postimin e saj ka thënë se kundërshtohet çdo përpjekje që synon të cenojë pavarësinë e Kosovës.
“Ne kundërshtojmë kategorikisht çdo përpjekje për të vënë në pikëpyetje pavarësinë dhe sovranitetin e Kosovës”, ka shkruar Ambasada në Twitter, duke theksuar se pavarësia është fakt dhe qëllimi i tyre është mbështetja e Kosovës.
“Pavarësia e Kosovës është fakt. Qëllimi ynë parësor është të mbështesim Kosovën pasi ajo zë vendin e saj të merituar në strukturat evropiane dhe euroatlantike”, ka theksuar Ambasada e SHBA-së.
Ndryshe, profili në Twitter i Ambasadës së Shteteve të Bashkuara të Amerikës në Prishtinë ka pëlqyer një postim në të cilin presidenti i Serbisë, Aleksandër Vuçiq, ka thënë se nëntë shtete e kanë tërhequr njohjen e Kosovës të mërkurën në mbrëmje.
Por, një ditë më pas, të enjten e 5 janarit, Ambasada e ka hequr pëlqimin.
The U.S. Embassy official Twitter account did not intentionally "like" any posts on Twitter in the past 24 hours. As noted previously: when we have a position to articulate, we do so via official, attributable statements – not by a social media "like." 2/2
— U.S. Embassy Pristina (@USEmbPristina) January 5, 2023