Kryeministri i Shqipërisë, Edi Rama, do të marrë pjesë në Forumin Ekonomik Botëror që do të mbahet më 16-20 janar në Davos-Klosters, Zvicër.
Siç raporton A2CNN, i pranishëm në këtë takim do të jetë edhe presidenti i Serbisë, Aleksandër Vuçiq, ndërsa pritet edhe konfirmimi i pjesëmarrjes së presidentes së Kosovës, Vjosa Osmani.
“Bashkëpunimi në një botë të fragmentuar”, do të jetë tema e forumit, në të cilin, do të marrin pjesë më shumë se 2700 liderë nga 130 vende.
Takimi vjen derisa krizat e shumta po thellojnë ndarjet dhe copëtojnë peizazhin gjeopolitik.
Udhëheqësit duhet të adresojnë nevojat e menjëhershme, duke i hedhur gjithashtu bazat për një botë më të qëndrueshme dhe më elastike deri në fund të dekadës.
Çështjet që pritet të diskutohen janë krizat ekonomike, energjetike dhe ushqimore.
Programi i takimit të 53-të fokusohet në zgjidhjet dhe bashkëpunimin publik-privat për t’i trajtuar sfidat më urgjente të botës.
Në takim do të jenë edhe kancelari gjerman, Olaf Scholz, kryeministri holandez, Mark Rutte, presidentja e Komisionit të BE-së, Ursula von der Leyen, si dhe Sekretari i Përgjithshëm i OKB-së, António Guterres.