Ambasadori i Kosovës në Kroaci, Martin Berishaj, ka deklaruar se nuk e njeh kryeministrin e Sllovenisë, Robert Golob.
Ai i ka cilësuar si lajme të rreme raportimet e Golobit, teksa shton se nuk është takuar asnjëherë me të.
“Kryeministrin e Republikës së Sllovenisë, z. Robert Golob nuk e njoh, kurrë nuk e kam takuar në jetën time dhe nuk kam qenë kurrë në kontakt me të, kështu që pavarësisht asaj se sa herë do ta ricikloni lajmin e rrejshëm, ai vetëm lajm i rrejshëm mbetet”, ka shkruar Berishaj në Facebook.
Kryeministri i Sllovenisë, Robert Golob, të enjten u mundua të shfajësohet përmes një deklarimi publik, pas dyshimeve për përfshirje në skandalin financiar me ambasadorin e Kosovës në Kroaci.
Kryeministri Golob është pyetur në emisionin Odmevi në RTS skandalit financiar ku i përfshirë është Martin Berishaj.
Golob deklaroi se sa i përket përfshirjes së emrit të tij “e gjitha është një trillim”.
Sipas tij, si lajm është sponzorizuar nga kundërshtarët e tij politik.
“A e dini se kush e nisi këtë?”, e pyeti Golob gazetarin, “Këtë e ka nisur partia SDS para zgjedhjeve tona. Në atë kohë ata thanë se më financuan mua dhe fushatën time”.
Golob shtoi se më vonë u zbulua se Berishaj në fakt nuk është i afërt me të, por me kundërshtarin e tij Janez Jansha.
“Në gjysmë të rrugës morëm vesh se ky zoti Berishaj, i cili meqë ra fjala është ambasador në Zagreb, është mik personal i Janez Jansha, dhe në momentin që çështja u zhduk nga Sllovenia tani u ringjall, me sa duket në Kosovë”.
Golob shtoi se nuk e di kush e ka “ringjallur” çështjen, “ndoshta miq, armiq, nuk e kam idenë”.