Ministri i Mbrojtjes i Ukrainës ka thënë se Rusia po përgatit një ofensivë të re të madhe dhe paralajmëroi se ajo mund të fillojë më 24 shkurt.
Oleksii Reznikov ka theksuar se Moska kishte grumbulluar mijëra trupa dhe mund të “provojë diçka” për të shënuar përvjetorin e pushtimit fillestar vitin e kaluar.
Sulmi do të shënonte gjithashtu Ditën e Mbrojtësit të Atdheut të Rusisë më 23 shkurt, e cila feston ushtrinë.
Ndërkohë, tre persona kanë humbur jetën në një sulm të fundit në qytetin Kramatorsk.
Ndërsa, tetë të tjerë u plagosën në një qytet në rajonin e Donetsk, pasi një raketë ruse goditi një ndërtesë banimi, tha guvernatori i provincës.
“E vetmja mënyrë për të ndaluar terrorizmin rus është ta mposhtim atë”, shkroi presidenti ukrainas, Volodymyr Zelensky, në mediat sociale për sulmin.
“Me tanke. avionë luftarakë. Raketa me rreze të gjatë”, theksoi ai, shkruan BBC.
Ndryshe, Ukraina i ka rritur kohët e fundit thirrjet për avionë luftarakë, për ta ndihmuar në mbrojtjen nga sulmet ajrore, pasi Gjermania, SHBA dhe Britania e Madhe ranë dakord t’u dërgonin atyre tanke.
Reznikov bëri të ditur se Moska kishte mobilizuar rreth 500,000 trupa për ofensivën e mundshme.