Lideri i serbëve në Bosnje e Hercegovinë (BeH), Milorad Dodik, teksa ka folur për themelimin e Asociacionit të komunave me shumicë serbe, ka thënë se kryeministri i Kosovës, Albin Kurti, po i shmang detyrimet ndërkombëtare.
Dodik ka komentuar deklaratën e Kurtit, në të cilën ai krahasoi Republikën Srpska me Asociacionin.
“Themelimi i Asociacionit është pjesë e Marrëveshjes së Brukselit, të cilën Kurti nuk dëshiron ta zbatojë, edhe pse ka karakterin e një detyrimi ndërkombëtar”, ka thënë Dodik, shkruan Kosovo-Online.
Ndryshe, Kryeministri i Kosovës, Albin Kurti, kishte thënë se Serbia dhe presidenti serb, Aleksandër Vuçiq, nuk dëshiron marrëveshje. Sipas tij, Beogradi e do Asociacionin që Kosova të bëhet jonfunksionale.
Kështu ishte shprehur kreu i qeverisë në një intervistë për televizionin “N1 Sarajeva”, ku kishte ritheksuar se Kosova nuk do të lejojë një Republika Sërpska brenda saj, duke mos lejuar Serbinë që të kopjojë modelin e Bosnjë-Hercegovinës.
“Ne duam një marrëveshje, por, Beogradi e Vuçiqi duket se nuk e duan këtë. Duam marrëveshje që do ta ketë në qendër njohjen e ndërsjellë. Kosova nuk do të lejojë një Republika Sërpska brenda saj, dhe e dimë mjaft mirë se Serbia e do pikërisht këtë. Kemi përvojë të hidhur nga Bosnjë-Hercegovina dhe jemi shumë të kujdesshëm që Serbia të mos e kopjojë atë model edhe në Kosovë. Serbia do një shtet të saj brenda Kosovës”, kishte thënë Kurti.
Sipas tij, qëllimi i Serbisë është destruktiv dhe se nuk do asgjë për serbët e Kosovës.