Plagosja e një personi në veri me armë zjarri të hënën e 10 prillit, është cilësuar si vrasje në tentativë nga Policia e Kosovës.
Kështu është bërë e ditur në raportin 24-orësh të policisë, ku theksohet se i plagosuri tashmë gjendet jashtë rrezikut për jetë.
Ai është plagosur nga persona të cilët ende nuk janë identifikuar.
“Viktima mashkull kosovar është duke u trajtuar në spitalin e Mitrovicës veri , pasi që i njëjti është plagosur me armë zjarri nga person-a ende të paidentifikuar. I njëjti gjendet jashtë rrezikut për jetë, është njoftuar prokurori dhe rast është në procedurë hetimore”, thuhet në raport.
Ndryshe, shkaqet dhe rrethanat e plagosjes ende nuk dihen, teksa bëhet e ditur se janë duke u kryer hetimet e nevojshme për zbardhjen e rastit.
Policia e Kosovës ka sqaruar se nuk ka qenë e përfshirë në asnjë rast të shkëmbimit të zjarrit apo “të gjuajtjes me armë zjarri ndaj asnjë grupi apo personi të caktuar”.
Raportimet e mediave serbe të cilat thonë se Policia e Kosovës është e përfshirë, sipas tyre nuk janë të vërteta.
“Andaj edhe shkrimet, apo pyetjet e adresuara Policisë së Kosovës nga disa mediume serbe, se kinse Policia e Kosovës është përfshirë, apo në formën e pyetjes se a është përfshirë në gjuajtje me armë dhe plagosje të një personi te ura e Bistricë në komunë të Leposaviqit, ju informojmë dhe njëherit ritheksojmë se Policia e Kosovës, nuk është përfshirë në asnjë rast të shkëmbimit apo gjuajtjes me armë zjarri, në asnjë lokacion në veri të Kosovës, përfshirë edhe lokacionin e apostrofuar”, thuhet në njoftim.
Viktima është duke qëndruar në qendrën spitalore në Mitrovicën Veriore, sipas mjekëve është jashtë rrezikut për jetë.