Deputeti nga radhët e Partisë Demokratike të Kosovës (PDK), Mërgim Lushtaku, ka tentuar që përmes goditjeve me shishe në foltoren e Kuvendit të Kosovës t’ia pamundësojë fjalimin deputetit të Lëvizjes Vetëvendosje, Enver Dugolli.
Në kohën kur Dugolli filloi të flasë në foltoren e kuvendit, deputeti Mërgim Lushtaku iu afrua dhe filloi ta godasë foltoren, me qëllim të krijimit të zhurmës dhe pamundësimit të deputetit të VV-së që ta vazhdojë fjalën e tij.
Ndërkaq, deputetët e PDK-së, dhe një pjesë e LDK-së, për afro 20 minuta kanë tentuar që ta pengojnë vazhdimin e seancës së kuvendit, me goditje të tavolinave e fishkëllima.
Ky reagim i opozitës vjen pasi kërkesa e tyre për themelimin e komisionit hetimor për energji, nuk po votohet nga deputetët e pozitës.
Për këtë arsye partitë opozitare kanë bërë të ditur se nuk do të marrin pjesë në asnjë votim të Kuvendit të Kosovës, pa u themeluar komisioni.
Seanca është shtyrë deri në ora 12 e 30.
Me goditje të tavolinës e fishkëllima, deputetët e opozitës po e bojkotojnë punën e kuvendit