Nxënësi i klasës së shtatë, të mërkurën në mëngjes, shkoi në shkollën fillore “Vladislav Ribnikar”, debatoi me rojën dhe e vrau, para se të futej në klasë në orën e historisë dhe t’i qëllonte nxënësit.
Ai la të vdekur tetë nxënës dhe plagosi shtatë të tjerë. Armën që e përdori për ta kryer krimin e kishte marrë nga babai.
14-vjeçari që kreu krimin makabër me nëntë të vrarë në Beograd, kishte marrë pjesë në shumë gara shkollore dhe ishte nxënës i dalluar.
Ai kishte marrë pjesë disa herë në garat e matematikës dhe e kishte fituar vendin e tretë në garën e lëndës së biologjisë.
Sipas mediave serbe, 14-vjeçari e kishte inatin me mësuesin e historisë. Pikërisht në klasën ku ai po mbante mësim, ka hyrë dhe ka qëlluar pa mëshirë. Mësuesi ka mbetur i plagosur.
Sipas dëshmitarëve, autori i ngjarjes ishte ngacmuar nga bashkëmoshatarët e tij vitin e kaluar. Këtë vit, atij iu ndërrua klasa, ku vazhdonte të ishte viktimë e ngacmimit nga bashkëmoshatarët.
Ai është arrestuar. Pas arrestimit, i pyetur nga policët se përse ka kryer krimin, 14-vjeçari është përgjigjur “Jam psikopat”.
Në vendin e ngjarjes kanë dalë ministri i Arsimit i Serbisë, Branko Ruzhiq dhe ministrja e Shëndetësisë, Danica Grujiçiq.
“Të gjitha informatat relevante lidhur me tragjedinë dhe rrethanat në të cilat ka ndodhur ajo, do të bëhen të ditura nga Ministria e Brendshme, ndërsa institucionet kompetente shëndetësore do të njoftojnë për gjendjen e të plagosurve”, tha përmes një deklarate Ministria e Arsimit e Serbisë.
Sindikata e Punëtorëve të Arsimit në Serbi ka theksuar se “tragjedia në shkollën fillore është dëshmi se jetojmë në kushte ekstreme dhune”.
Ministria e Punëve të Jashtme e Malit të Zi shprehu ngushëllime për familjet e viktimave.
“Në këtë moment të vështirë, mendimet tona janë me të plagosurit, të cilëve u urojmë shërim të shpejtë”, thuhet në deklaratën e saj.
Zhelko Komshiq, anëtar i Presidencës së Bosnje dhe Hercegovinës, i dërgoi ngushëllime presidentit të Serbisë, Aleksandar Vuçiq.
Sekretarja e përgjithshme e Këshillit të Evropës, Marija Pejçinoviq Buriq, shkroi në Twitter se “është e tronditur dhe e pikëlluar nga të shtënat” në shkollën “Vlladisllav Ribnikar” në Beograd.