Agjencia e Statistikave të Kosovës (ASK), të premten ka publikuar raportin e llogarive qeveritare për periudhën 2015-2021.
Ky publikim paraqet pasqyrën e të hyrave dhe shpenzimeve qeveritare brenda kësaj periudhe.
Të hyrat e Qeverisë për vitin 2021, sipas ASK-së, ishin 2 milionë e 484 mijë 600 euro.
Sipas raportit të ASK-së pë periudhën 2015-2021, pjesën më të madhe të të hyrave e përbëjnë tatimet në produkte, të cilat paraqesin 67% të totalit të të hyrave, tatimet rrjedhëse në të ardhura 13%, aktivetet dhe detyrimet financiare 11%, ndërsa pjesa e mbetur e të hyrave është shpërndarë në kategori tjera të të hyrave.
Kurse shpenzimet e Qeverisë, në vitin 2021 ishin 2 milionë e 376 mijë e 400 euro.
“Pjesën më të madhe të shpenzimeve e përbëjnë: kompensimi i punëtorëve 27%, kontributet sociale dhe përfitimet 26%, konsumi i ndërmjetëm 14%, formimi i kapitalit bruto 13%, ndërsa pjesa e mbetur e shpenzimeve është shpërndarë në kategoritë tjera të shpenzimeve”, thuhet në njoftimin e ASK-së.
ASK ka theksuar se ky publikim është përgatitur në përputhje të plotë me Udhëzuesin e Fondit Monetar Ndërkombëtar për Statistikat e Financave Qeveritare (GFSM 2014) dhe sipas Sistemit të Llogarive Evropiane (ESA 2010).