Konferenca e Kryetarëve do të mblidhet në orën 12:30, ku përfaqësues nga pozita dhe opozita do të ulen në tavolinë për fillimin e procedurave dhe përcaktimin e datës së votimit të parë për zgjedhjen e presidentit të shtetit.
Enkelejd Alibeaj, pasditen e së hënës ka konfirmuar se opozita, përkatësisht Partia Demokratike (PD) do të jetë pjesë e tryezës së Konferencës së Kryetarëve.
Përfaqësues të opozitës në këtë mbledhje do të jenë edhe Agron Gjekmarkaj, Fatmir Mediu, Mesila Doda dhe Grida Duma.
Ditë më parë opozita ka prezantuar një draft, në të cilin parashikohet se si duhet bërë zgjedhja e presidentit të ri dhe si duhet vepruar raund pas raundi.
Pikërisht për këtë çështje pritet të diskutohet këtë të martë.
Pavarësisht se i ka votat e mjaftueshme për të zgjedhur e vetme presidentin e vendit, Partia Socialiste (PS) ka shprehur gatishmërinë e saj për të dëgjuar në tryezë përfaqësuesit e opozitës parlamentare si dhe shoqërinë civile.
Ndërsa, prej javësh është krijuar një “zhurmë” presidenciale me emra, propozime dhe supozime, por ende nuk ka një emër zyrtar si kandidat për t’i zënë vendin Ilir Metës, i cili përfundon mandatin në muajin korrik.