Kryetari i LDK-së, Lumir Abdixhiku, ka reaguar pas kidnapimit të tre policëve nga forcat serbe brenda territorit të vendit, duke thënë se lirimi i tyre i menjëhershëm është domosdoshmëri.
Ai ka theksuar se “të tre policët e rrëmbyer i presim në shtëpi. E sipas tij, ky është borxhi ynë si Republikë përballë agresionit luftënxitës të Serbisë”.
Ndërsa, për lirimin e tyre, Abdixhiku ka deklaruar se bashkërendimi e përafrimi me aleatë është i paalternativë.
“Prandaj, sot, bie dhe perdja e naiviteti popullist që këtë bashkërendim e shihte si dobësi. Dobësi e vetme është thirrja e vonuar për ndihmë, pasi je poshtëruar”, ka shkruar ai në rrjetin social, Facebook.
Ndër të tjera, ai ka kërkuar përgjegjësi politike institucionale nga kryeministri Albin Kurti dhe vartësi i tij.
“Ushtrimi i sovranitetit të vërtetë kërkon mençuri”, ka shtuar ai.
Tre policë kufitarë të Kosovës janë rrëmbyer nga njësia speciale policore e Serbisë brenda territorit të Kosovës.
Zëdhënësi i Policisë, Baki Kelani, ka deklaruar se pretendimet se ata ishin arrestuar brenda territorit të Serbisë, nuk janë të vërteta.
Policët ishin patrullues kufitarë dhe kryenin detyrën e tyre në një pikë statike në territorin e Kosovës për të parandaluar kalimin e grupeve kriminale dhe kontrabandën, duke përfshirë dyshime për armatim në atë zonë.