Kamionët me mallra me origjinë nga Serbia nuk po lejohen të hyjnë në territorin e Republikës së Kosovës nga pika kufitare në Bërnjak.
Ekipi i RTV Dukagjini, i cili po raporton drejtpërdrejt nga vendi i ngjarjes, bën të ditur se qytetarët nga të dyja anët e kufirit me automjete po lejohen të qarkullojnë sikur çdo ditë tjetër.
Ndërkaq, të njëjtat janë ndaluar edhe nga pika kufitare e Merdares.
Pas kidnapimit të tre policëve të Kosovës nga policia e Serbisë, janë bllokuar të gjitha mallrat serbe të hyjnë në Kosovë.
Ndryshe, Policia e Kosovës gjatë ditës ka bërë të ditur se tre zyrtarët e saj policorë dyshohet të jenë kidnapuar në territorin e Kosovës në veri të vendit, përkatësisht në komunën e Leposaviqit.
Po ashtu, në lidhje me kidnapimin e tyre ka reaguar edhe kryeministri Kurti, i cili ka kërkuar ndihmë nga ndërkombëtarët që ata të lirohen menjëherë.
Sipas tij, kjo është hakmarrje nga ana e Serbisë ndaj arrestimit të djeshëm të serbit me nofkën “Llune”.