Këtë javë do të zhvillohen ndeshjet e dyta gjysmëfinale të ‘play-offit’.
Golden Eagle Ylli është sërish vendas ndaj Sigal Prishtinës, pas fitores së takimit të parë të cilin e fituan bindshëm therandasit 73-48.
Kampioni do të mundohet të shënojë fitore edhe në përballjen e dytë, në mënyrë që të jetë më afër finales, kurse prishtinasit pasi pësuan humbje të thellë në sfidën e parë, kërkojnë fitoren për të barazuar serinë gjysmëfinale.
Në garat e rregullta, Ylli kishte rezultuar si lider me 22 fitore e gjashtë humbje, kurse prishtinasit në vendin e pestë me 15 fitore e 13 humbje, ndërsa në katër përballjet direkte fitore kanë shënuar therandasit.
Gjysmëfinalja e dytë mes Trepçës dhe Pejës pritet të jetë e ‘zjarrtë’ si ajo e para, që përfundoi me fitoren e mitrovicasve 75-68. Interesimi është i jashtëzakonshëm në Mitrovicë. Atmosfera ishte e jashtëzakonshme në takimin e parë, dhe kështu pritet edhe të enjten mbrëma.
Mitrovicasit përfunduan garat e rregullta në vendin e dytë, me 19 fitore e shtatë humbje, kurse pejanët në vendin e tretë, me 18 fitore e dhjetë humbje.
Në ndeshjet direkte në elitë, tri fitore kanë mitrovicasit ndaj një fitore të pejanëve. Trepça e kishte mundur Pejën edhe në gjysmëfinale të Kupës.
Skuadra e cila shënon tri fitore kualifikohet në finale.