Kisha Ortodokse Serbe dhe shteti, edhe si platformë politike edhe si kostume, gjithmonë qëndrojnë afër.
Dëshmi të gjalla janë pamjet e shënimit të 600 vjetorit të betejës së Kosovës në Gazimestan afër Obiliqit, përvjetor në të cilin, kasapi i Ballkanit, Slobodan Millosheviq hapi kapitullin e përgjakshëm të shfarosjes së fqinjëve, ndër ta edhe shqiptarët e Kosovës.
Vidovdani prapë do të organizohet nën strumbullarin e Kishës Ortodokse, por në tjetër lokacion.
Manifestimi nis nga ora 07:00 në mëngjes, ndërkaq kjo do të jetë foltorja, e këtu do të qëndrojnë ulur një pjesë e të ftuarve. Anash tyre me shumë gjasë do të jenë qindra serbë anë e mbanë Kosovës.
Vendimi për të ndryshuar lokacionin është marrë nga peshkopi Teodosije Shibaliq.
Prifti serb në rolin e institucionit të sigurisë ka ardhur në përfundim se lokacioni ndërrohet për shkak të situatës së sigurisë.
Për këtë çështje përkujdeset Policia e Kosovës, e cila sipas ekspertëve të sigurisë, kanë dijen dhe përgatitjen për çfarëdo situate që mund të ndodhë të mërkurën.
“Ajo që duhet të jetë vigjilente është Shërbimi jonë i Inteligjencës, Inteligjenca e Policisë duhet të kujdeset nga infiltrimi i personave të cilët mund të jenë të orkestruar nga shërbimet inteligjente serbe për të krijuar incident të cilin Vuçiqi e dëshiron edhe Kisha Ortodokse Serbe e dëshiron”, ka thënë Fadil Kajtazi, njohës i çështjeve të sigurisë.
Miti mbi betejën e Kosovës, sipas historianëve, mori hov në shekullin 17-18 kur nisi zgjimi i nacionalizmave në Ballkan.
Beteja në të cilën luftuan gjithë popujt e Ballkanit por që lavdinë e përvetësoi mitologjia serbe, sipas historianëve, deri tash nuk mbahet mend të jetë festuar larg Gazimestanit.
“Prapë është një lloj manipulimi për faktin se serbët tani pretendojnë për përhapjen ose identifikimin e këtij miti.. Është një lloj aludimi i pastër politik që problemet e veriut t’i bartin edhe në pjesë tjera të Kosovës. Në njëfarë mënyre beteja e Vidovdanit ka qenë njëfar lloj burimi i cili ka rezultuar me njëfarë lloj politike e cila politike ju ka sjellë dëme dhe probleme gjithë Ballkanit”, ka thënë Muhamet Mala, historian.
Në anën tjetër, Kajtazi thotë se është e çuditshme se si në Kosovë lejohet shënimi i kësaj date, duke pasur parasysh në këtë datë Millosheviqi nisi fushatën e shfarosjes së popujve fqinj.