Prokuroria Speciale e Republikës së Kosovës (PSRK), ka njoftuar se kanë ngritur aktakuzë ndaj dy personave me inicialet B.N dhe D.M për veprën penale keqpërdorim i pozitës apo autoritetit zyrtar.
Të akuzuarit nga prokuroria dyshohet se nga shtatori i vitit 2011 deri në gusht të 2018-tës në cilësinë e personave zyrtarë në Aeroportin Ndërkombëtar të Prishtinës (ANP), e më pas në Agjencinë e Shërbimeve të Navigacionit Ajror (AShNA), i kanë mundësuar një kompanisë nga Tirana OE “TCN”, përfitime të paligjshme.
“Prokuroria Speciale njofton opinionin publik se gjatë periudhës kohore nga muaji shtator 2011 deri në gusht 2018, në vazhdimësi dhe në cilësinë e personave zyrtarë në Aeroportin Ndërkombëtar të Prishtinës (ANP), më pas Agjencia e Shërbimeve të Navigacionit Ajror (AShNA), të pandehurit B.N. dhe D.M e kanë keqpërdorur detyrën zyrtare duke i mundësuar OE “TCN” nga Tirana, përfitim të kundërligjshëm”, thuhet në njoftimin e prokurorisë.
Në vitin 2011 AShNA (Agjencia për Shërbime të Navigacionit Ajror) kishte shpallur tenderin për projektin “Furnizimi dhe instalimi i pajisjeve të navigimit ajror”. Vlera e këtij tenderi për të cilën është ngritur aktakuzë ndaj dy personave ishte rreth 8 milionë euro.